Usa ka himsog nga batang lalaki ang gipanganak sa usa ka inahan sa kalsada duol sa ilang balay sa Sabang, Danao City, Cebu karong adlawa, Disyembre 10, 2020.

Buot unta nga dalhon sa ospital ang inahan kay nag-bati na alas 3:34 pm karong adlawa, hinungdan nga niresponde ang Danao City CDRRMO/RESCUE211’s EMS Unit.

Apan sigon sa CDRRMO Danao City fb page, nanganak na ang babaye nga wa pa gani makaabot sa ambulansya.

“A pregnant woman from Brgy. Sabang due for delivery was about to be transferred to the nearest hospital, however they didn’t make it to the ambulance,”sigon sa CDRRMO Danao City.

Si Jerry Biatingo Jr., kinsa maoy duty ug usa ka registered nurse sa 211 Emergency Medical Services(EMS) maoy mipaanak sa inahan diha mismo sa dalan.

“The team safely delivered a baby boy! After the delivery, both the baby and her mother were brought to the nearest hospital,”dugang sa CDRRMO Danao City.

Sigon sab ni Leo Manulat, kinsa apil sa Danao City CDRRMO responders, duol pa sa balay sa pasyente nahitabo ang pagpanganak.

Matod ni Manulat, himsog kaayo ang bata kinsa ikatulo na nga anak sa inahan.

“Duol pa sa ilaha sir. Wla na kaabot sa ambulance. Gikuha na lng namog stretcher. Gipaanak na lang sa stretcher,”matod ni Manulat.

Niawhag ang CDRRMO sa tanang buntis nga manganakay nga planohon gyod ang ilang pagpanganak aron di masubli ang sitwasyon.

(Photo by Leo Manulat)