Giguyod nalang hinoon sa laing barko ang MV Mika Mari III aron makaabot sa Consuelo Port, San Francisco, Camotes Island, Cebu alas 6:09 pm kagabii (March 2, 2020).
Kini human nga maabiriya sa mga 2 nautical miles paingon sa maong pantalan.
Sigon ni Lieutenant Junior Grade Eric Salcedo, tigpamaba sa Philippine Coast Guard Central Visayas, nga dunay problema sa makina ang barko human mibiya sa Danao City alas 2:30 sa hapon.
Duna kini sakay nga 133 ka pasahero, 17 ka crew ug 16 ka rolling cargoes o mga sakyanan.
Ang Coast Guard station sa Consuelo mipadala dayon sa ilang motorboat uban sa sister vessel LCT JSC1 nga maoy ni-tow sa Mika Mari III paingon sa Consuelo port.
“Initial info revealed that the cooling system of the distressed vessel malfunctioned that caused their main engine to overheat and eventually fail,”sigon ni Salcedo.
Ang kapitan sa Mika Mari gimandoan nga mo-file og marine protest.
(HULAGWAY GIKAN SA PCG 7)
