Niduso si Cebu 5th District Rep. Vincent “Duke” Frasco og balaudnon nga nag tinguha nga dunay barato nga lungon alang sa mga kabus nga mamatay.
Nakita ni Frasco nga daghan sa mga pamilya nga doble ang kagul-anan kon mamatyan.
Maguol ang pamilya nga namatyan, ug masamtan pa ang kaguol tungod sa kamahal sa gasto labi pa sa lungon.
“Dagko kaayo ang bayranan nga kasagaran paninglon sa mga punerarya. Ang mga yanong pamilya maglisud gyud sa pagbayad niini. Naguol pa sa kamatayon sa miyembro sa pamilya, malisang pa sa kadaku sa utang alang sa paghaya ug paglubong,” matod ni Frasco sa iyang press release.
Matod ni Frasco nga ang mga lungon karon naa sa P5,000 ngadto sa P300,000
Pero ang baratohon dili sab available ug walay stock.
“Duna kunoy barato pero wala poy stock. Mao nga ang pamilya nga namatyan walay mahimo kung dili pagpili nalang sa kung unsay available, which is ang mga mahal na,” matod sa kongresista.
Kon mapasar ug mahimong balaod, ang mga punerarya kinahanglan na nga may barato nga lungon nga mapalit sa mga kabus.
Sa mga mahalon nga punerarya, kinahanglan nga may lungon nga dili molapas sa P12,000 alang sa mga kabus.
“Kung mahimo nang balaud ang iyang gisang-at nga proposal, ang mga punerarya obligado nga magtener ug lungon nga makab-ot ang presyo. Kung mga mahalon nalang ang anaa sa punerarya, obligado sila nga mopaubos sa presyo nga dili molapas sa P12,000 kung certified nga indigent ang pamilya sa nipanaw,”matod ni Frasco.
Ang molapas nga punerarya may multa nga P200,000 ngadto sa P400,000 o kaha pagkatangtang sa business permit ug uban pang lisensya.
(File photo: Mga lungon sa mga biktima sa 2018 landslide sa Naga)
