ANG House Committee on Labor and Employment mi-approved sa substitute bill ug committee report sa House Bill 2633 nga giduso ni Trade Union Congress of the Philippines Rep. Raymond Democrito C. Mendoza.

Kon hingpit nga mapalabang sa House of Representatives, matugtan lang ang job losses o mawad-an og trabaho ang trabahante kon dunay redundancy nga linugdangan sa merger o panag-ipon o pagbaligya sa kompaniya.

Ang empleyado nga madiklarar nga ‘redundant’ o susama ra og trabaho sa laing trabahante, hatagan og kahigayunan nga makatrabaho sa bag-ong gimugna nga position kon makakuha siya sa kwalipikasyon.

Ang mga sakop sa union ug ubang empleyado sa surviving company padayon nga makakuha sa benepisyo nga gilatid sa collective bargaining agreement (CBA) sa wa pa ang merger sa mga kompaniya.

Kon ang CBA sa kompaniya ni-expire unya ang lain naa pa, ang union maka-negotiate sa mga bag-ong economic provisions.

Ang balaodnon naglatid sab sa pagpahigayon og certification election alang sa merged company aron pagtino kon unsa nga union ang morepresent sa surviving company.

Sigon ni Rep. Mendoza nga ang balaodnon iyang giduso human sa unprecedented merger activity sa mga kompaniya nga nagtinguha nga mahimong mas dako ug mas competitive, labi pa sa mga multinational companies.

“This plethora of previously unfamiliar corporate occurrences creates a trail of novel issues… This is particularly when the issue of the security of tenure, diminution of wages and benefits, and other employment terms and conditions comes to fore,”matod ni Mendoza sa explanatory note sa iyang bill.