MIABOT sa lima ka sitios sa Damolog, Sogod Cebu ang apiktado sa baha ug buhawi pasado alas 5 kagahapon sa hapon.
Si Kapitan Gaspar Monisit ug kagawad Neil Arnejo mitug-an sa dyLA nga 15 pa ka mga balay, tindahan ug mga structures ang ilang naihap nga naguba sa sitios Highlander ug Proper.
Padayon pa ang ilang assessment sa sitios Eme, Villagonzalo ug Patag.
Sigon sa duha ka barangay officials, wala hinooy naunsa sa mga tawo.
Ubay-ubay nga mga gagmayng establishments daplin sa kalsada ang apiktado, sanglit kining dapita kilid sa highway ug hunonganan sa mga sakyanan kay aron mamalit og utanon ug pagkaon.
Gani, ang portion sa restaurant ni Kapitan Monisit nahun-ag sa baha.
Ang computer shop sab ni Arnejo nasudlan sab og tubig ug nangabasa ang mga equipment.
Ang mga residente miingon nga dunay buhawi nga miigo sa bukid nga maoy nakaingon sa baha.
