Si Jocelyn Parada ug iyang 20-anyos nga anak nilarga gikan sa Ormoc City aron manarbaho sa Iloilo City.
Si Jocelyn motrababo sa bodega samtang sa construction site sab ang iyang anak. Ang inahan ug anak nangiyawat intawon nga makatrabaho kay wa gyod silay panginabuhian sa Ormoc atol ning pandemic.
Apan kutob ra sila sa Cebu niadtong Sabado kay gipangitaan sila’g negative swab test result aron makasakay sa barko paingon Iloilo.
Diha ra sila na-stranded sa port terminal sa Pier 1 samtang naghuwat nga makapaubos sa swab test.
Apan nahimamat niya ang ubang mga pasahero paingon sa Iloilo nga stranded sab tungod sa sa swab test requirement.
Naagni si Jocelyn nga mokuyog sa laing duha ka babaye nga naka-estorya sa usa ka lalaki sa Pier 1 nga mipasalig nga maoy mo-process sa ilang negative swab test result ug ticket sa barko.
Ang maong mga pasahero mao sila si Eva Sabong kinsa taga Naval Biliran ug moduaw sa nagkasakit niyang amahan sa Iloilo, ug si Virginia Dedeles kauban sa 10 anyos niyang anak gikan sa Butuan City.
Si Dedeles mikuha niining iyang anak nga didto mipuyo sa 79-anyos nga lolo sa Butuan kinsa apil sa Pantawid program sa gobiyerno. Kay tiguwang naman kini, gikuha na ni Dedeles ang bata.
Ang unang naestorya sa lalaki mao si Sabong. Giila ang lalaki sa apilyido nga Baguio, taga Arellano St. ug usa sa giilang “kurimaw boys” sa Pier 1 (sigon sa barangay tanod nga naghatod sa mga pasahero sa Police station).
Matod ni Jocelyn nga nabalaka gyud unta siya nganong naay swab test result nga wa man siya ma-swab apan gipasaligan sila sa lalaki nga way problema ug daghan nang nakalarga.
Tuod man, si Jocelyn mibayad og P4,600 ngadto ni Baguio. Ang P2,000 para sa swab test ni Jocelyn ug anak. Ang uban para sa ilang ticket sa barko para Iloilo plus tip.
Si Dedeles nakabayad og P3,500 para sa negative swab test result ug ticket sa barko niya ug sa 10-anyos nga anak.
Samtang si Sabong nakabayad og P2,700.
Nahatagan gyod sila sa mga dokumento- ticket sa barko ug negative swab test result nga may logo sa Chong Hua hospital.
Kagabii Marso 22, paingon na sila mosakay sa barko apan gi-hold na sila sa Port terminal tungod kay fake ang swab test result ug gi-turnover sa barangay San Roque.
Gidala sab sila sa Waterfront Police station aron ipa-blotter ang ilang gidangatan.
Si Jocelyn miingon nga nangurog gyod siya sa kahadlok sa terminal dihang giingnan nga fake ilang swab test result.
Wa na sab siya’y kwarta kay nahurot sa mangingilad.
“Inutang pa gyod to paramakalarga lang ug makatrabaho,”sigon ni Jocelyn.
