PATAY na nga naugkat ang duha ka lalaki nga natabunan human midahili ang yuta atol sa pagpanguykoy nila og bas sa kilid sa sapa sa Sitio Ylaya, Barangay Talamban, Cebu City kaganihang buntag, Hunyo 21, 2020.
Giila ang mga biktima nga sila si Ramy Cadampog, 28, ug Erwin Cadampog, 17.
Sa pakighinabi sa dyLA, nagkanayon si Talamban Barangay Captain Dario Arcilla nga manag-uyoan ang mga biktima nga natabunan sa bas.
Pasado alas 9:00 kaganinang buntag nadawat ang alarma nga adunay nahitabong pagdahili sa tunnel nga kilid sa sapa sa maong sitio.
Matod ni Arcilla nga nangawot og bas ang manag-uyoan nga giingon ibaligya unta.
“Gibawalan naman unta na dinha dapita kay kilid sa sapa. Pero daghan gihapon manguha diha kay nindot ang bas g’yud,” sigon ni Arcilla.
Karong hapon nakit-an na ang duha sa mga rescuers ug wa nay kinabuhi nga nadala sa ospital. (Nestle Semilla)
