Sigon sa Mandaue City Fire Department investigor SF02 Edgar Vergara, miabot gyod sa 150 ka balay ang naugdaw human nga naglisod sila sa pagpawong dayon sa kayo.
Tungod sa kahagip-ot sa kalsada, ang mga bombero nagsumpay-sumpay nalang sa mga hose aron makapasirit sila’g tubig sa nagdilaab nga mga balay.
Ikaduha kining sunog nga miigo sa Mandaue City sulod sa usa lang ka adlaw. Unang nasunog Lunes sa kaadlawon ang 15 ka balay sa barangay Centro diin namatay ang retiradong huwis ug ang asawa samtang wa pa igkita ang apo.
Tungod sa pagdako sa kayo, giisa ang alarma ngadto sa Task Force Alpha ala 1:44 p.m. ug hingpit kining napawong alas 4:06 p.m.
Gitumbok sa kabomberohan nga ang kayo nagsugod sa ikaduhang andana sa balay ni Grace Balaba ug gituohang ‘faulty electrical wiring’ ang nakaingon.